Usa ka bahin sud sa University of the Visayas (UV) main campus sa dalan Colon, dakbayan sa Sugbo ang gialarma nga nasunog, alas 4:16 sa buntag, Biyernes, Agusto 16, 2024.
Ang mga bombero sa Cebu City Fire Office (CCFO) daling nitubag sa alarma diin alas 4:19 sa buntag giisa sa first alarm ug hingpit nga napawong pagka alas 4:29 sa kaadlawon.
Ang CCFO nibanabana sa danyos sa maong sunog nga nikabat og P70,000.
Dunay usa ang naangol human maigo ang tuong kamot sa nangatagak nga bildo nga giila nga si Tris John Wayne Tabada, 25, nga daling giatiman sa medical team.
Matod ni Fire Officer 1 Michael John Nable, fire investigator on case sa CCFO, ang ikaduhang andana sa tunghaan ang nasunog apan wala na siya mohatag og detalye kung unsa kini nga department samtang gisubay pa usab kung unsay hinungdan sa maong sunog. / AYB