Sikop sa Tagbilaran City Police Station ang duha ka drug personality atol sa gilusad nga buy-bust alas 9:15 sa gabii, Martes, Mayo 20, 2025, sa Binayran Road, Upper Candait, Barangay Dampas, Siyudad sa Tagbilaran, ProbinsIya sa Bohol ug nakuhaan og kapin sa usa ka kilo nga shabu.
Ang mga nadakpan giila nga sila si Jopel Mondejar, 31, nga maoy target sa operation nga nabutang sa listahan sa PNP isip high value individual (HVI), construction worker, residente sa Tawala, Panglao, Bohol ug ang iyang batabata nga si Leolito Dahab, 35, Printshop Worker, taga Barangay Ubujan, Dakbayan sa Tagbilaran. Nakuha sa mga operatiba ang binulto sa gituohang shabu nga motimbang sa 1,050 gramos nga dunay standard drug price nga P7.1 milyunes.
Ang mga nakuhang ebidensya giduso na sa PNP Forensic Unit sa Bohol Police Provincial Office alang sa himuon nga chemical analysis.
Matod ni Police Lieutenant Colonel John Kareen Escober ang hepe sa Tagbilaran City Police Station nga usa ka buwan nila nga gi-monitor ang ilegal nga kalihukan ni Mondejar.
Base sa imbestigasyon, maka-baligya siya og 200 gramos sa shabu matag semana ug ang iyang area sa distribution mao ang tibuok Tagbilaran ug mga silingan nga lungsod sa Bohol.
Kalapasan sa Section 5 ug 11, Article II, Republic Act 9165 ang ipakasaka nga kaso sa kapulisan sa duha ka mga suspek. / AYB