Giaprobahan sa Konseho sa Dakbayan sa Lapu-Lapu ang Supplemental Budget No. 1 nga nagkantidad og P738,288,134.
Usa kini ka lakang nga nagtumong sa pagpalig-on sa serbisyo publiko ug pagpalambo sa paghatud sa serbisyo sa panglawas.
Gibutyag ni Konsehal Annabeth Cuizon, chairperson sa Committee on Finance, sa usa ka interview sa SunStar Cebu nga ang ordinansa naglakip sa General Fund (GF) sa dakbayan nga mikabat og P687,149,734 ug alang sa operasyon sa ospital nga nagkantidad og P51,138,400.
Matod ni Cuizon nga ang unang SB alang sa 2025 giaprobahan sa ikatulo ug katapusan nga pagbasa atol sa regular session sa konseho niadtong Miyerkules, Hunyo 18.
Sa kinatibuk-ang P687.14 milyunes, ang P676,149,734 ipundo sa nagkalainlaing departamento ug opisina sa dakbayan, diin ang Office of the City Mayor ang nakadawat sa kinadak-ang bahin nga P214.74 milyunes.
Dako usab ang nakuhang alokasyon sa Office of the Senior Citizens Affairs nga adunay P151.06 milyunes, City Environment and Natural Resources Office nga adunay P111.62 milyunes, ang City Engineer’s Office gitaganan og P31.1 milyunes, samtang ang Persons with Disability Affairs Office nakadawat og P29.57 milyunes.
Gihatagan usab ang Disaster Risk and Reduction Management Office og P27 milyunes ug ang City Traffic and Management Office og P26.9 milyunes. Ang City Health Office ug Financial Aid to Barangays nakadawat og P15 milyunes matag usa.
Gipunting ni Cuizon nga usa ka dakong bahin sa alokasyon sa CHO ang gigahin alang sa programa sa pagbakuna batok sa rabies.
Gipasabot niya nga ang pundo gitubag sa nagkadaghan nga kaso sa animal bites nga gi-report sa dakbayan.
Subay sa datus gikan sa Animal Bite Treatment Center, natala sa Dakbayan sa Lapu-Lapu ang 12,662 ka kaso sa pinaakan sa hayop gikan Enero hangtod Mayo 2025, mas taas kon itandi sa 9,908 ka kaso nga gi-report sa susamang panahon sa 2024.
Ang City Tourism Office adunay alokasyon nga P9.62 milyunes, gisundan sa City Treasurer’s Office nga adunay P7.7 milyunes, ug ang PDMO nga adunay P7.6 milyones.
Ang City Planning and Development Office nakadawat og P5.85 milyunes, samtang ang Hoopsdome nakakuha og P4.44 milyunes, ug ang Retirement and Other Benefits gigahinan og P4 milyunes.
Ang General Services Office adunay budget nga P3.24 milyunes ug ang City Social Welfare and Development Office nakadawat og P3 milyunes.
Ang Bids and Awards Committee Office gigahinan og P2.27 milyunes, gisundan sa Sangguniang Panlungsod nga adunay P2 milyunes, ug ang Lapu-Lapu City College nga adunay P1.5 milyunes.
Gihatagan ang CBO og P560,000, ang Lapu-Lapu City Police Office nakadawat og P555,000, ug ang Local Civil Registrar adunay P540,000.
Ang City Accounting Office gigahinan og P500,000, ang City Assessor’s Office nakakuha og P385,500, ug ang City Prosecutor’s Office nakadawat sa kinagamyang alokasyon sa P310,000.
Sa pagkompleto sa kinatibuk-ang alokasyon sa GF, P11 milyunes ang gigahin alang sa mga proyekto sa pagpalambo.
Ang pundo alang niining SB kuhaon gikan sa mga tinigum ug mga giuli gikan sa miaging tuig nga mga alokasyon, lakip na ang wala magamit nga Maintenance and Other Operating Expenses (MOOE), Capital Outlay, ang Development Fund, ug ang wala maaprubahi nga surplus sa dakbayan sa 2024 nga mikabat og P669 milyunes.
Gilatid sa SB 1 No. 2025-02, usa ka P51.1 milyunes nga budget ang gialokar aron mapalambo ang serbisyo sa panglawas sa dakbayan.
Ang budget hingpit nga gikuha gikan sa 2024 unappropriated surplus sa dakbayan.
Matod ni Cuizon, ang alokasyon espesipikong gigahin alang sa City Hospital sa Barangay Gun-ob, Dakbayan sa Lapu-Lapu ug Sta. Rosa Community Hospital sa Olango Island, nga nagkantidad og P48,738,400 ug P2.4 milyunes, matag usa. / DPC