Laing kalampusan sa Lapu-Lapu City Police Office (LCPO) ang pagkasikop sa usa ka high value individual ug nakuhaan og kapin sa usa ka kilo nga shabu.
Usa ka joint operation sa mga special unit sa LCPO, ubos pagdumala ni Police Lt. Col. Dindo Juanito Alaras ug nakig-alyon sa Philippine Drug Enforcement Agency (PDEA 7), gilusad ang buy bust sa Nobiyembre 6, 2023 sa alas 11:23 sa gabii sa Sityo Camansi, Brgy. Pajo, Lapu-Lapu City.
Usa ka alias Clars, 30, ulitawo, way trabaho, taga-dalan Tres De Abril, Barangay Punta Princesa, Siyudad sa Sugbo nga mo-dispose og binulto nga drugas sa dakbayan sa Lapu-Lapu, nasikop.
Nasakmit gikan sa suspek ang 1.1 ka kilo sa gituohang shabu nga dunay street drug price nga P7.4 milyunes.
Nasayran sa kapulisan nga maka-dispose kini og shabu nga tag upat ka kilo matag buwan sa iyang supplied area sa Cebu City, Mandaue ug Lapu-Lapu.
CEBU CITY
Sayo sa samang adlaw, nasikop usab sa Philippine Drug Enforcement Agency (PDEA 7) ug Cebu City Police Office ang usa ka 23 anyos nga lalaki sa buy-bust sa sityo Tangkongan, Brgy. Sambag 1, dakbayan sa Sugbo, sumala sa taho sa GMA 7 Super Radyo.
Ang suspek nga nakuhaan og usa ka kilo sa gituohang shabu nga dunay street drug price (SDP) nga P6.8 milyunes giila nga si Jay Bard Abaquita, 26, e-trike driver, taga Brgy. Suba, dakbayan sa Sugbo.