Kapin sa P7 milyunes nga balor sa ilegal nga drugas nasakmit sa Waterfront Police Station atol sa gilusad nga buy-bust sa alas 3:50 sa Biyernes sa kaadlawon, Hulyo 5, 2024 sa Sitio Lumboy, Brgy. San Roque, Dakbayan sa Sugbo.
Ang suspek giila nga si alyas Farah, 48, minyo, taga Stockton Village, Brgy. Punta Princesa, Dakbayan sa Sugbo.
Nasakmit sa kapulisan ang 1,050 gramos sa gituohang shabu nga mobalor og P7,140,000 nga gi-turnover sa PNP Forensic Unit 7 alang sa chemical analysis.
Matod ni Police Major John Lynbert Yango, hepe sa Waterfront Police Station, nga nigawas ang ngalan ni Farah gikan sa unang nadakpan nga si Dalia niadtong Hunyo 17, 2024 nga nakuhaan usab og kapin sa usa ka kilo sa gituohang shabu.
Siya ang bodegera ni Dalia sa ilegal nga drugas ug usa sa mga mo-dispose niini sa Dakbayan sa Sugbo, lakip sa mga silingang dapit Sugbo.
Human nigawas ang iyang ngalan gipaubos dayon nila sa monitoring ug nasuta nga tinuod ang pamahayag ni Dalia.
Nabutang si Farah sa listahan sa PNP isip High Value Individual kay makabaligya og usa ka kilo nga shabu sa duha ka buwan, diin ang iyang contact naa sa sulod sa Abuyog Penal Farm sa Lalawigan sa Leyte.
Nadakpan na niadtong 2016 si Farah sa kaso gihapon sa ilegal nga drugas ug sa sulod sa Cebu City Jail sila nagkaila ni Dalia ug nakagawas sa December 2021.
“Didto sila ani nagkaila ni Dalia sa sulod sa prisohan. So, diha nagsugod ang ilang connection,” matod ni Yango.
Si Police Col. Ireneo Dalogdog, hepe sa kapulisan sa Dakbayan sa Sugbo nihangop sa pagkasikop ni Farah.
Ang amo sa duha naa sa sulod sa Abuyog Penal farm giila nga si alyas Pidoy.
“Na trace nato asa gikan ang iyang illegal drugs. Gikan ni sa Abuyog, Leyte. Kini nagpasabot lang nga bisan sa atong ka busy sa paghatag sa siguridad sa Palarong Pambansa. Wala nato biyai ang atong campaign sa anti-criminality and law enforcement operation nga maoy kamandoan ni Police Brigadier General Anthony Aberin,” matod ni Dalogdog. / AYB