Drug personality nga makaduha na mabilanggo, nadakpan pagbalik sa Bohol Police Provincial Office (BPPO) alas 6:51 sa hapon, Martes, Agusto 12, 2025, sa Purok 5, Barangay San Isidro, Dakbayan sa Tagbilaran, Lalawigan sa Bohol.
Ang nadakpan giila nga si Garry Noel Binamira alyas Nonoy, 40, taga Sitio Villa Ambrosia, Brgy. Poblacion Sur, Lungsod sa Carmen, Bohol.
Nakuha gikan kaniya ang 1,035 gramos nga gituohang shabu nga mobalor sa P7,038,000.
Lakip sa nasakmit sa kapulisan ang usa ka kalibre .45 nga pistola ug duha ka mga bala gikan sa iyang hawak.
Ang Provincial Intelligence Unit sa BPPO nakadawat og impormasyon nga naghitak ang suplay sa ilegal nga drugas sa Barangay San Isidro.
Gumikan niini, nihimo dayon og intelligence monitoring ang PIU ug nasuta nga si Binamira maoy namaligya sa ilegal nga drugas.
Gilusad dayon ang buy-bust sa pagpangulo ni Police Lieutenant Noubell Padernal inabagan sa Tagbilaran City Police Station nga nisangpot sa pagkasikop sa maong suspek.
Sigon sa gihimong background investigation sa suspek, giila siya nga high value individual diin dinagko nga suplay sa ilegal nga drugas ang mabaligya niini sa Tagbilaran lakip na sa 3rd ug 1st district sa Bohol ug sa Lungsod sa Carmen.
Si Binamira nagsugod sa iyang pagpamaligya sa ilegal nga drugas niadtong 2014 apan nadakpan siya pagka 2016 sa Carmen Municipal Police Station ug ang ikaduha niadtong 2019.
Kalapasan sa Section 5 ug 11, Article II, Republic Act 9165 ug Republic Act 10591 ang atubangon nga kaso sa maong suspek. / AYB