Moabot sa P8.1 milyunes nga balor sa ilegal nga drugas ang nasakmit sa mga sakop sa City Intelligence Unit-City Drug Enforcement Unit sa Mandaue City Police Office (MCPO) atol sa gilusad nga buy-bust, alas 12:51 sa kaadlawon sa Biyernes, Abril 25, 2025, sa Arcolina St., Barangay Ibabao-Estancia, Siyudad sa Mandaue.
Ang nasikop giila sa alyas nga Jem-Jem, 41, usa ka high value individual nga taga Sitio Paglaum, Barangay Bulacao, Dakbayan sa Sugbo.
Nasakmit gikan kaniya ang 10 ka dagkong putos sa gituohang shabu nga motimbang sa 1.2 kilos nga dunay standard drug price nga P8,160,000.
Lakip sa nakuha ang usa ka cellular phone nga gituohan nga maoy gigamit sa illegal drug transaction ug ang boodle money nga mobalor sa P49 mil ug buy-bust money nga P1,000.
Ang mga nakuhang ebidensya giduso na ngadto sa Regional Forensic Unit 7 alang sa chemical analysis ug safekeeping, samtang ang suspek kasamtangan nga gikustodiya sa Station 1 sa MCPO.
Kasong kalapasan sa Section 5 ug 11, Article II, Republic Act 9165 o Comprehensive Dangerous Drugs Act of 2002 ang atubangon sa suspek.
Matod ni Police Colonel Cirilo Acosta Jr., ang hepe sa Mandaue City Police Office nga ang malampuson nga pagkasakmit sa maong gidaghanon sa illegal nga drugas ug pagka-sikop sa suspek naggumikan sa ilang way paglubad nga pasalig sa katawhan sa Mandaue nga wagtangon ang illegal nga drugas sa siyudad.
“The Mandaue City Police Office remains steadfast in its resolve to dismantle drug networks and bring offenders to justice. This operation sends a clear message that we will not allow illegal drugs to destroy our communities,” matod ni Acosta.
Nagpadayon ang gihimong imbestigasyon sa kapulisan sa dakbayan sa Mandaue kung asa gikan ug kinsa ang mga downline sa maong suspek nga mao unya ang target sa ilang himuon nga follow up operation. / AYB