Mogahin og P80.7 milyones nga pundo ang Kagamhanan sa Dakbayan sa Lapu-Lapu alang sa nagkadaiyang proyekto human niini giaprubahan ang Supplemental Annual Investment Program (AIP) no. 3 para sa tuig 2025.
Kini nga pundo nga kuhaon sa ilang General ug Development Funds igahin alang sa nagkadaiyang proyekto sa kalamboan.
Matud pa nga ang P21 milyones kuhaon gikan sa Development Fund, samtang ang P59,705,513 gikan sa General Fund.
Sa P21 milyones nga Development Fund, ang P18 milyones niini gamiton alang sa pagbalhin, pag-instalar og balik, ug pagpaayo sa mga isolation facilities sa Lapu-Lapu City College.
Ang nahabilin nga P3 milyones gamiton sa pagpahimutang sa slope protection, fencing, ug pagpaayo sa Basak Super Health Center.
Pormal nga giaprobahan sa City Development Council Executive Committee ang Development Fund pinaagi sa Resolution No. 2025-12.
Ang AIP No. 3 naglatid usab sa nagkadaiyang galastohan ubos sa hapit P60 milyones nga General Fund, nga naglangkob sa personnel support, pagpalit og mga kagamitan, imprastraktura, ug panginahanglanon sa operasyon. / DPC