P80K env’tal fee nakolekta sa Lapu-Lapu sa unang adlaw

P80K env’tal fee nakolekta sa Lapu-Lapu sa unang adlaw
SunStar Local News GPX

Ang Kagamhanan sa Dak­bayan sa Lapu-Lapu nagsugod na’g kolekta sa P100 nga environmental fee gikan sa mga lokal ug langyaw nga turista nga mag island hopping ug u­­ban pang mga kalihukan sa ka­dagatan sa dakbayan.

Ang environmental fee kolektahon lang niadtong mag-island hopping, banana boat rides, parasailing, diving ug ubang water sports ug walay apil kadtong mangaligo lang sa dagat.

Sa unang adlaw sa pag-implementar sa environmental fee sa Mayo 1, 2024, daghan nga mga nagpa-book og pumpboats alang sa island hopping namalhin sa Cordova, apan matod ni Konsehal Annabeth Cuizon, kinsa maoy nagpaluyo sa environmental fee ordinance, nga wala nila kini did-i ug libre sila nga mamili kon asa nila gusto.

Si Cuizon nagkanayon nga ang pundo nga ilang matigum maoy ilang gamiton sa pagmentinar sa tourist sites sa dakbayan ingon man sa paghimo og mga proyekto nga makatubag sa mga panginahanglanon sa mga bisita.

Niining panahon sa El Niño, gidagsa ang isla sa Mactan og mga turista aron mo-relax ug magpabugnaw sa kadagatan ug kini gilauman nga makaapekto sa kalimpyo sa kalikupan nga posible’ng makahatag og peligro sa panglawas sa katawhan kon dili matubag dayon, hinungdan nga nakahukom si Cuizon sa paghimo og environmental fee ordinance.

Ang makolekta nga environmental fee maoy isweldo sa cleaners, health officers, security personnel ug safety officers nga ilang gitahasan sa pagmintenar sa lugar.

Si Cuizon nagkanayon nga ang mga Water and Sanitation Rescuers (WASAR) ug Bantay Dagat personnel maoy ilang gitahasan sa pagbadlong niadtong makalapas sa balaod, partikular na niadtong mag water sports nga manukad gikan sa laing lugar apan mosulod sa kadagatan sa Lapu-Lapu.

Ang makalapas sa ordinansa padad-an og written notice sa unang kalapasan, multa nga P3,500 sa ikaduhang kalapasan, ug P5,000 sa ikatulo’ng kalapasan, uban ang pagbakwi sa business permit sa maong resort.

Nasuta nga sa unang adlaw sa pag implementar sa environmental fee niadtong Mayo 1, nakakolekta ang Siyudad og P80,000 gikan sa upat ka pier sa dakbayan, matod ni Councilor Cuizon, nga mao usab ang chairperson sa city committee on finance and appropriation.

“Nagpasalamat ko sa 800 tourists nga nibayad sa environmental fee. Nagpasalamat sab ko sa mga nisuporta, ug nagpasalamat ko sa mga comments sa mga tour operators kay nakita nato ang problema nga angay nato sulbaron,” si Cuizon nagkanayon.

Gitataw ni Cuizon nga ang ubang mga local government units (LGUs) dugay nang nag-implementar sa environmental fees apan wala mamatikdi gumikan kay gi-integrate kini sa hotel accommodation charges. / PR

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph