Kapin sa usa ka kilo nga gituohang shabu ang nasakmit sa Police Regional Office 7 (PRO-7) atol sa duha ka adlaw nga simultaneous anti-criminality and law enforcement operation (SACLEO) gikan sa Agusto 12-14, 2024.
Base sa datos nga gipahibawo sa PRO-7 nakahipos ang tanang operatiba sa kapulisan og 1,304.04 ka gramos sa gituohang shabu nga dunay standard drug price nga P8.8 milyones nga miresulta sa pagkasikop sa 85 ka drug personalities.
Sa kampanya batok illegal gambling ang kapulisan nakasikop og 111 ka sugarol sa 88 ka operasyon ug pagkasakmit sa P10,044 nga kita o pusta sa sugal.
Wala usab magpaulahi ang ilang paghingusog sa kampanya batok loose firearms subay sa kamandoan sa Kampo Crame nunot sa nagsingabot nga midterm election sunod tuig diin nakaimbargo sila og 31 ka mga armas atol sa 30 ka mga operasyon diin 11 ka tawo ang nangadakpan samtang ang uban mitahan sa ilang mga armas.
Sa paglutos sa mga wanted person, nakasikop sila og 68 ka mga tawo nga adunay mga nag-ung-ong nga mga warrant of arrest diin ang siyam niini giila nga mga most wanted person. / AYB