Nagkauyon ang Dallas Mavericks ug si Kyrie Irving alang sa $119 million ug tulo ka mga tuig nga contract extension alang sa All-Star guard sa National Basketball Association (NBA).
Nahimo kining posible human nakadesisyon si Irving nga dili gamiton ang iyang $43 million player option sa katapusang tuig sa iyang kasamtangang tulo ka mga tuig nga kontrata sa Mavericks.
Nahitabo kining maong kalambuan bisan padayon si Irving sa pagpaalim gikan sa iyang torn ACL injury nga maoy hinungdan nga dili siya makapakita og aksyon sa sayong bahin sa 2025-26 season.
Ang bag-ong kontrata ni Irving gi-adjust sa kontrata ni Anthony Davis, kinsa nasulod sa Mavericks niadtong Pebrero pinaagi sa makapakugang nga trade nga nagpabalhin ni Luka Doncic sa Los Angeles Lakers.
Si Davis aduna pa’y nahabiling tulo ka mga tuig sa iyang kasamtangang kontrata nga aduna sab player option sa 2027-28, sama sa bag-ong kontrata ni Irving.
Kining kalambuan kabahin ni Irving naghatag og grabeng kahinam sa Mavericks kabahin sa ilang ugma damlag hilabi na inig sulod ni Duke star Cooper Flagg, kinsa maoy seguradong kuhaon sa Mavericks isip No. 1 overall pick sa umaabot nga rookie draft.
Sila si Irving, Davis, ug Flagg mao ang bag-ong Big Three sa Mavericks apan dili kini mahulma hangtod dili pa makabalik si Irving. Gibanabana nga karon pang Disyembre o Enero makabalik pagduwa si Irving. / Gikan sa wires