GIHANDOM sa pagkamapaub-sanon sa pagdawat sa kadaugan ug sa iyang kapildihan si kanhi Gobernador Pablo Garcia sa iyang anak nga si Winston, kanhi Presidente ug General Manager sa Government Service Insurance System (GSIS), nga nagpagawas sa ikaduhang public statement human sa eleksiyon.
Kini nahitabo pipila ka adlaw human gipasaka sa iyang igsuon, ang kasamtangang Gobernador sa Sugbo nga si Gwendolyn Garcia, ang usa ka electoral protest nga nikuwestiyon sa resulta sa piniliay niadtong Mayo 12, 2025.
Ang pamahayag, isip usa ka tribute sa adlaw nga natawhan sa iyang amahan, si anhing Pablo “Pabling” Garcia.
“In a world often defined by winners and losers, my father… stood as the kind of leader who never allowed either victory or defeat to cloud his sense of purpose or service,” pamahayag ni Winston.
Gihandom niya ang mga dekada nga pagserbisyo publiko sa iyang amahan ug nahinumdom kon giunsa pagdawat ni Pabling Garcia ang iyang kapildihan sa congressional race sa Mayo 2013 batok sa bag-ong kandidato kaniadto nga si Wilfredo Caminero, human nakadaog og pito ka sunod-sunod nga eleksiyon.
“To many, it was unexpected. To him, it was simply part of the rhythm of public service—the rise and fall, the give and take,” matod niya.
“He bore the defeat not with denial or resentment but with serenity and statesmanship. He accepted the people’s verdict with a humble heart,” dugang ni Winston.
Bisan og wala maghisgot si Winston ug ngalan ug sa bisan unsang kasamtangang politikanhong kalambuan, ang tayming sa mensahe daw dunay gipasabot.
Gipagawas kini pipila ka adlaw human gikuwestiyon ang resulta sa midterm elections niadtong Mayo 12, 2025, sa usa ka electoral protest nga gisang-at ngadto sa Commission on Elections (Comelec) sa iyang igsuon nga gobernador.
Gipasabot sa mensahe ni Winston nga ang tinuod nga kabilin sa iyang amahan dili politikal nga gahum, kondili kalig-on sa moral: “Because in the end, true greatness isn’t measured by how long we hold on to power—but by knowing when to let it go.”
Gitapos niya ang iyang pamahayag sa pag-ingon, “That is his legacy—not power but the quiet strength of a life lived with humility, integrity, and goodness. I miss him dearly.”
Ang iyang naunang pamahayag nga gipagawas human sa eleksiyon, nag-ila sa kadaugan ni Governor-elect Pamela Baricuatro ug nagpasalamat sa mga tuig sa serbisyo nga gihatag sa ilang pamilya.
Samtang sa iyang mga tuig isip opisyal sa gobiyerno, si Gwendolyn naghimo og kasaysayan niadtong 2004 isip ang unang babaye nga napili nga gobernador sa Probinsiya sa Sugbo nga nipuli sa iyang amahan.
Nagserbisyo siya og tulo ka sunod-sunod nga termino hangtod 2013, dayon nibalik sa katungdanan niadtong 2019.
Human makumpleto ang iyang tulo ka termino isip gobernador, si Garcia napili isip ang unang babaye nga representante sa ika-3 nga Distrito sa Sugbo, nagserbisyo gikan 2013 hangtod 2019.
Atol sa iyang panahon sa Kongreso, gihuptan sab niya ang papel sa House Deputy Speaker gikan 2016 hangtod 2018.
Sa piniliay niadtong Mayo 12, si Baricuatro nidaog sa gubernatorial race sa 1,107,924 ka boto batok sa iyang kontra nga 765,051, dunay biya nga 342,873 ka boto.
Ang electoral protest nagkuwestiyon sa mga resulta sa kapin sa 4,100 ka clustered precincts nga giingong kadudahan ang transmission sa mga boto.
Ang kaso pending pa sa Comelec. / CDF