Nagpaulbo og three-point bomb si Tyrese Haliburton sa nahabiling 1.1 segundos aron agakon ang Indiana Pacers sa laing makapaukyab nga daog batok sa Cleveland Cavaliers, 120-119, sa Game 2 nga naghatag kanila og 2-0 nga bintaha sa Eastern Conference 2nd round playoffs series sa National Basketball Association (NBA) ning Miyerkules, Mayo 7, 2025 (PH time).
Ang Cavaliers, nga nasugamak sa 112-121 nga pilde sa Game 1, daw paingon na untang makatabla sa series dihang nakaposte sila og pito ka mga puntos nga labaw, 119-112, sa nahabiling 48 ka mga segundos.
Apan human niini, gihuman sa Pacers ang kombati pinaagi sa 8-0 run sa pagpangulo ni Haliburton, kinsa nakapasulod pa og duha ka freethrows sa himatyong mga segundos una niya nahimo ang iyang nakapadaog nga tres.
Ang Pacers gipangulohan nila ni Aaron Nesmith ug Myles Turner pinaagi sa ilang 23 puntos matag usa samtang ningdugang og 19 puntos matag usa sila si Haliburton ug Bennedict Mathurin.
Bisan wala ang tulo sa ilang mga sinaligan nga sila si Darius Garland, Evan Mobley ug De’Andre Hunter, ang Cavaliers mao ang nagkontrolar hapit sa kinatibuk-ang duwa sa pagpangulo ni Donovan Mitchell, kinsa nirehistro og 48 puntos.
Paghuman sa 1st quarter, nakamugna og 17 puntos nga labaw ang Cavaliers, 32-15.
Sa pagpadayon sa kombati, kanunay nga naglabaw og dobleng numero nga puntos ang Cavaliers hangtod na sayong bahin sa 4th quarter apan gipapas kini sa Pacers.
“Cleveland hit us with a hellacious punch early in the game and it was difficult to get the ball over half court, let alone score,” matod ni Indiana coach Rick Carlisle nga napatik sa AFP. “We played from behind the whole game. But in the fourth quarter we just hung in there. We’ve been in a lot of these situations down the stretch this season.”
Puntos matag usa:
Indiana (120)- Nesmith 23, Turner 23, Haliburton 19, Mathurin 19, Nembhard 13, Siakam 12, Toppin 7, McConnell 4.
Cleveland (119)- Mitchell 48, Strus 23, Allen 22, Merrill 14, Okoro 5, Wade 3, Jerome 2, Porter Jr. 2. / Gikan sa wires