Nimugna og triple-double nga 32 puntos, 15 assists ug 12 rebounds nga wala’y turnover si Tyrese Haliburton sa iyang makasaysayong playoffs performance aron agakon ang hosts Indiana Pacers sa kadaugan batok sa New York Knicks, 130-121, ning Miyerkules, Mayo 28, 2025 (PH time), sa National Basketball Association (NBA).
Ang kadaugan maoy naghatag sa Pacers og dominanteng 3-1 nga bintaha sa Eastern Conference finals best-of-seven series.
Si Haliburton maoy labing unang magduduwa sa kasaysayan nga nakarehistro sa labing dagkong mga numero sa statistics sukad nga giapil og rekord ang turnovers niadtong 1977-78.
Nalabwan ni Haliburton sila si Nikola Jokic sa Denver Nuggets ug basketball legend Oscar Robertson, kinsa nakatali og 30 puntos, 15 assists ug 10 rebounds sa usa ka playoff game kaniadto,
“I’ll look at that later and reflect on that at a different time. For me, it’s just about winning,” matod ni Haliburton nga napatik sa AP News.
“ I wanted to prove I could respond when my back is against the wall, my team’s back is against the wall. I feel like we responded the right way.”
Si Pascal Siakam nidugang og 30 puntos, nitunol og 20 puntos si Bennedict Mathurin samtang niamot og 16 puntos si Aaron Nesmith alang sa Pacers.
Ang Knicks gipangulohan ni Jalen Brunson pinaagi sa iyang 31 puntos, nihatag og 24 puntos ug 12 rebounds si Karl-Anthony Towns samtang niamot og 22 puntos si OG Anunoby.
Mao kini ang labing unang higayon ning maong series nga nidaog ang home team.
Ang Game 5 mobalik sa balwarte sa Knicks karong Biyernes, Mayo 30.
“We’ve all got to be better. We’ve got to be better as a team,” matod ni Towns. “It’s unfortunate we couldn’t find a way tonight when we found a way in all the other series to do it.”
Puntos matag usa:
Indiana (130)- Haliburton 32, Siakam 30, Mathurin 20, Nesmith 16, Turner 13, McConnell 6, Toppin 5, Bradley 3, Nembhard 3, Sheppard 2.
New York (121)- Brunson 31, Towns 24, Anunoby 22, Bridges 17, Hart 12, Robinson 6, McBride 3, Wrigth 3, Shamet 3. / Gikan sa wires