Mosuway pagsulod sa National Basketball Association (NBA) Finals ang Indiana Pacers sa ilang pagpakigsangka og balik sa hosts New York Knicks karong alas 8:00 sa Biyernes sa buntag, Mayo 30, 2025 (PH time), sa Game 5 sa Eastern Conference finals best-of-seven series.
Ang Pacers, nga adunay 3-1 nga bintaha ning maong series, nagtinguha nga makasulod sa NBA Finals sa ikaduha pa lang nga higayon.
Sa premirong pagsulod sa Pacers sa NBA Finals niadtong 2000, gipakyas sila sa Los Angeles Lakers, 2-4.
Apan ning higayuna, malaumon ang Pacers nga maangkon nila ang labing una nilang kampyunato sa pagpangulo ni Tyrese Haliburton, kinsa niposte og playoffs record nga triple double 32 puntos, 15 assists ug 12 rebounds nga wala’y turnover sa ilang kadaugan sa Game 4, 130-121.
“We’re still pretty young so we’re learning by some of the experience that we’re getting right now,” matod ni Pacers coach Rick Carlisle. / Gikan sa wires