
Gipakuratan pag-usab sa Indiana Pacers ang top-seeded nga Cleveland Cavaliers, 129-109, sa Game 4 sa National Basketball Association (NBA) Eastern Conference semifinals sa Indianapolis ning Lunes, Mayo 12, 2025 (PH time).
Ang No. 4 Pacers nipakita og dakong surprisa sa series kay ila mang nakontrolar ang Cavaliers ug mikuha na kini og dominante nga 3-1 series lead.
Si Pascal Siakam nikamada og 21 ka puntos samtang sila Myles Turner ug Obi Toppin nipuno og 20 puntos matag usa sa yanong nga kadaugan sa Pacers.
Grabe ka dominante ang Pacers kay gani nakatabla kini sa NBA playoff record nga 41 puntos nga labaw sa halftime.
Gitali sa Pacers ang labing dakong labaw sa dula og 44 ka puntos, ug nisulod sa halftime nga may 80-39 nga labaw, nga maoy nitabla sa record sa Boston Celtics sa 2017 Eastern Conference finals.
Ang head coach sa Indiana nga si Rick Carlisle nagkanayon nga bisan labaw na sila sa series, wa pa silay nabuhat kay kinahanglan nila ikompleto gyud ang kadaogan.
“We haven’t done anything yet,” sigon ni coach Carlisle. “We’re going to keep approaching this like we have everything to prove. We know people don’t believe in us, so we’re just going to stay in the fight and keep fighting.”
Ang Pacers pwede makakumpleto sa ilang misyon karong Miyerkules sa balwarte sa Cleveland, diin nakadaug na sila og duha ka higayon sa Games 1 ug 2.
Si Darius Garland maoy nangulo sa Cavs pinaagi sa 21 ka puntos nga maoy iyang ikaduhang duwa sukad sa injury sa tudlo. Si Mitchell nitapos og 12 puntos.
Sumala ni coach Kenny Atkinson, ipailawom og MRI si Mitchell karong Martes.
“Complete domination by them,” Atkinson said briefly, before explaining at least the Cavs have two of the final three games on their home court. “They dominated us in every facet of the game.”
Samtang ang ace player sa Pacers nga si Tyrese Haliburton nitampo og 11 puntos, lima ka rebounds ug lima ka assists. / RSC