Nakasiguro na og luna sa top four sa Eastern Conference ang hosts Indiana Pacers human nila gipatapsingan ang Cleveland Cavaliers, 114-112, sa Biyernes, Abril 11, 2025 (PH time), sa National Basketball Association (NBA).
Mahinungdanon ang pagsulod sa top four sa matag komperensya gumikan kay nagtangag kini og homecourt advantage sa nagkaduol nga playoffs.
Mao kini ang labing unang higayon gikan niadtong 2014 nga nakabaton og homecourt advantage ang Pacers sa playoffs.
Ang Pacers nga aduna na lang duha ka mga duwa nga nahabilin sa regular season, kasamtangang naa sa ikaupat nga luna sa East dala ang 49-31 nga rekord ug puwedi pa silang makasaka sa ikatulong puwesto.
Ang Pacers nga ningposte sa ikaunom nilang sunodsunod nga kadaugan, adunay pito ka mga magduduwa nga ningmugna og dobleng numero nga puntos pinangulohan sa 23 ni Tyrese Haliburton ug 22 ni Aaron Nesmith.
Ning sangkaa, ang Cavaliers ningkumbati nga wala ang upat sa ilang labing mga sinaligan nga sila si Donovan Mitchell, Darius Garland, Evan Mobley ug Max Strus.
Hinuon, dili ra tantong apektado ang Cavaliers sa ilang pagkapilde gumikan kay naangkon na man nilang daan ang No. 1 spot sa East bitbit ang 63-17 nga rekord.
Ang Cavaliers gipangulohan ni Ty Jerome pinaagi sa iyang 24 puntos, nitunol og 23 puntos si De’Andre Hunter samtang niamot og 16 puntos si Craig Porter Jr.
Bisan kuwangan sila og mga haligi, ang Cavaliers nakamaneho pagposte og 76-66 nga labaw sa hinapos nga bahin sa 3rd quarter.
Apan human niini, nagpaulbo og 12-0 nga rally ang Pacers aron ilugon ang labaw, 78-76.
Human niini, sikit na ang panagsangka hangtod na sa katapusang gutlo. / AP