Padayon nga misidlak ang bituon ni AJ Paciones sa professional boxing human niya gilupig ang beteranong Thai nga si Sanchai Yotboon sa ikaduhang round sa ilang WBO Oriental flyweight bout niadtong Mayo 31, 2025, isip bahin sa World Cup Boxing nga gipasiugdahan sa Highland Boxing Promotions sa World Siam Stadium, Bangkok, Thailand.
Gipakita sa 20-anyos nga si Paciones ang iyang teknikal nga kahibalo sa ring, diin gipuntirya niya ang bodega ni Yotboon gamit ang mahait nga kumo.
Sa unang round pa lang, nabungog na si Yotboon human siya patugpahi og left hook sa tiyan. Wala pa magdugay, natumba napud siya sa ikaduha nga higayon human og laing left hook sa kilid. Sa wala pa matapos ang round, miligid napud siya sa ikatulong higayon tungod sa left straight sa ulo.
Pag-abot sa ikaduhang round, na-knockdown nasab si Yotboon sa uppercut sa lawas, ug sa 1:01 mark, usa ka laing left hook maoy mitapos sa duwa.
Nagpabiling undefeated si Paciones sa record nga 11-0 nga adunay unom ka knockouts, samtang nanaog si Yotboon sa 18-10 (12 knockouts) record.
Sa undercard, gipilde ni Reymart Soledad ang Thai knockout artist nga si Jatupol Raksapet sa ilang ABF super-lightweight contest.
Sa 1:04 mark pa lang sa unang round, usa kaleft hook ang niigo kang Raksapet, nga direktang nagresulta sa knockout. / RSC gikan kang EKA