Usa ka buwan gikan sa iyang pagbalik sa hugot nga training, 100% sab nahibalik si Filipino boxing legend Manny Pacquiao sa iyang naandan ug daw wala’y nakitang timailhan nga nag-edad na kini og 46.
Mao kini ang gipabuhagay sa karaan na nga advisor sa Pambansang Kamao ng Pilipinas nga si Sean Gibbons.
“We’ve seen vintage Manny Pacquiao – training, sparring, preparation,” matod ni Gibbons nga napatik sa www.boxingscene.com.
Gipasabot ni Gibbons nga base sa iyang nakita sa training ni Pacquiao, daw nag-edad pa lang og kapin sa 20 ang bugtong 8-division world champion.
Base sa iyang gipanulti, wala’y bisan gamay nga pagduda si Gibbons nga adunay pa’y saktong ikabuga si Pacquiao sa pagbalik niini’g away human sa dul-an sa upat ka mga tuig nga pagretiro.
Si Pacquiao (62-8-2, 39KOs) nakatakdang mosuway pag-ilog sa korona ni World Boxing Council (WBC) welterweight champion American Mario Barrios (29-2-1, 18KOs) karong Hulyo 19, 2025 (PH time) sa MGM Grand sa Las Vegas, USA.
“Fight night’s fight night. That’s the big unknown everyone is coming to see. Does he still have it? The number may be 46, but the body’s in its 20s.”
Mismong si Pacquiao, wala’y pagduhaduha kabahin sa iyang kaugalingon ug masaligon siya nga aduna pa gyud siya’y ikabuga batok sa 30 anyos nga si Barrios.
“I’m happy with these first 30 days I’ve been in L.A. We’ve reached the level we wanted to accomplish,” matod ni Pacquiao.
“Most fighters come back at like 50-60 percent condition, just to come back. I don’t want that. I want 100 percent.”
Giklaro ni Pacquiao nga bisan gamay, wala nawagtang ang iyang kahinam sa pagpakig-away ibabaw sa ring. / ESL