Gipasabot ni Mexican boxing legend Juan Manuel Marquez nga dili mawala ang kakusog sa kumo sa usa ka boksidor bisan molabay na ang taas nga panahon.
Sa panahon ni Marquez, mao kini ang labing lig-ong hinagiban sa iyang kanhi karibal nga si Filipino icon Manny Pacquiao sa pagbalik og away niini karong Hulyo 19, 2025, sa Las Vegas, USA aron suwayan pag-ilog ang korona ni World Boxing Council (WBC) welterweight champion American Mario Barrios.
“Remember, power doesn’t go away. You might lose reflexes, rhythm, speed, but the power stays,” matod ni Marquez sa interbyu sa ringside24.com nga napatik sa www.philboxing.com.
“When you’re a disciplined fighter and Pacquiao is, he trains, he prepares, he’s coming in to win and to knock him out.”
Adunay unod ang gipanulti ni Marquez gumikan kay sulod sab sa tulo ka higayon siyang nakig-away ni Pacquiao kaniadto ug natural, nasayod siya kon unsa kakusog sa kumo sa Pambansang Kamao ng Pilipinas.
Hinuon lahi ang sitwasyon sa pagkakaron kay nag-edad si Pacquiao og 46 samtang 30 pa lang si Barrios.
Daghan ang mga nagduda kon aduna pa ba gyu’y ikabuga ang 8-division world champion sa pangidaron niini hilabi na kay dul-an na sab sa upat ka tuig nga wala siya nakaaway.
Apan alang ni Marquez, angayang hatagan og kahigayunan si Pacquiao nga makapamatuod nga aduna pa kini saktong ikabuga.
“If Pacquiao feels good, no shoulder, knee, or foot injuries, and he’s perfectly fine then let’s give him the benefit of the doubt. Let’s see what kind of fight he has to put up against Mario Barrios,” dugang ni Marquez.
“What matters is the integrity of the fighter. Pacquiao still hits hard. Let’s see how Barrios handles that.”
Kon modaog si Pacquiao ning awaya, hayan iyang mabuak ang kaugalingon niyang rekord isip labing edaran nga welterweight world champion. / ESL