Gipabuhagay ni Filipino boxing legend Manny Pacquiao nga wala’y angayang kabalak-an kabahin sa iyang desisyon nga mobalik og away sa edad nga 46.
Gipasabot sa kanhi 8-division world champion nga bisan dul-an sa upat ka tuig na siya nga wala niaway apan naa gihapon siya sa saktong kondisyon tungod kay wala siya nagpasagad sa iyang kaugalingon.
Nagkanayon ang Pambansang Kamao ng Pilipinas nga gikan sa iyang pagretiro, kanunay siyang nagpakondisyon pinaagi sa pagduwa og basketball ug badminton.
Tinuod nga wala na’y angayang pamatud-an si Pacquiao gumikan kay naabot na man niya ang kinatumyan sa kalampusan apan alang sa umaabot nga Hall of Famer, wala pa nawagtang ang iyang kahinam sa pagpakig-away ibabaw sa ring.
Mao kini ang hinungdan nga nakadesisyon si Pacquiao nga moaway pagbalik karong Hulyo 19, 2025 (PH time), diin suwayan niya pag-ilog ang korona ni World Boxing Council (WBC) welterweight champion American Mario Barrios sa MGM Grand Garden sa Las Vegas.
“People say I’m too old, that I’ve done it all. But I still have the fire,” pamahayag ni Pacquiao nga napatik sa www.abs-cbnnewws.com.
“I’m not just fighting for myself — I’m fighting for my country, and to show the world that we Filipinos never give up.”
Gipasalig ni Pacquiao nga sama kaniadto, maghatod siya og surpresa sa boxing fans sa tibuok kalibutan sa iyang pagpakigbatok sa 30 anyos nga si Barrios.
“My body is like, I feel young. I feel like, young. You can see. Like I see, I always bring surprises to the fans in every fight. So, this fight, I’m sure that me and Barrios, we can give a good fight to the fans,” matod ni Pacquiao.
Si Pacquiao kinsa adunay gitas-on nga 5’5”, naggunit og 62-8-2, 39 KOs nga rekord samtang si Barrios, kinsa adunay gitas-on nga 6’0”, naghupot og 29-2-1, 18KOs nga rekord. / ESL