Laing sikat nga magduduwa sa National Basketball Association (NBA) ang nikawat og oras aron personal nga makabisita ni Filipino boxing legend Manny Pacquiao sa luhong mansion sa Pambansang Kamao ng Pilipinas sa Forbes Park, Makati.
Si Brown, kinsa maoy Finals MVP dihang naangkon sa Celtics ang kampyunato sa 2024 NBA season, kasamtangang naa sa Pilipinas alang sa iyang Asian Tour 2025.
Niadtong Martes sa gabii, Agusto 12, 2025, nidalikyat si Brown aron makigkita sa bugtong 8-division world champion.
Tungatunga sa ilang paghimamat, si Brown, 28, nipadayag sa iyang intensyon nga mag-training kauban si Pacquiao dihang iyang nasayran nga kanunay nga mohimo ang Hall of Famer nga boksidor og abs exercise nga wala’y undang sulod sa tunga sa oras.
Gipakita sa 46 anyos nga si Pacquiao ang iyang daw abunda og pandesal nga abs ngadto kang Brown.
“Maybe one day, maybe the next time I come back, I want to train with you (Pacquiao),” matod ni Brown nga napatik sa Spin.ph.
Nagkanayon si Brown nga adunay similaridad ang training sa basketball ug boksing hilabi na sa footwork.
Nitubag si Pacquiao nga moduwa sab siya og basketball aron mapalambo ang iyang footwork. Gipakita sab ni Pacquiao ang iyang footwork ngadto sa NBA four-time All-Star.
“That’s great,” asoy ni Brown human niya nakita ang footwork ni Pacquiao.
Pagkahuman niini, nagduwa og chess sila si Pacquiao ug Brown. Gisultihan ni Pacquiao si Brown nga regular siyang makigduwa sa nag-unang chess grandmasters sa Pilipinas.
Nahuman ang ilang gabii ni Pacquiao ug Brown nga nagbinayloay sila og signed souvenirs .
Si Pacquiao nakadawat og autographed playing shoes gikan sa Celtics star samtang si Brown nakadawat og signed gloves gikan ni Pacquiao.
Si Brown maoy labing ulahing NBA star nga personal nga nibisita ni Pacquiao sunod nila ni Karl-Anthony Towns, Klay Thompson, ug Dwight Howard. / ESL