Gitudlo si Filipino boxing legend Manny Pacquiao isip honorary president sa Carry Fighting Championship (CFC), ang labing unang professional boxing promotion sa Taiwan.
Gianunsyo kini sa CFC ning bag-uhay lang.
Alang sa Team Pacquiao, kining maong kalambuan makapadasig sa senaryo sa boxing sa Taiwan ug mapalambo sab niini ang panagtambayayong sa Taiwan ug Pilipinas kabahin ning maong natad sa paugnat sa kusog.
Gipasabot sa CFC nga adunay daghang dekalidad ug potensyal nga mga boksidor sa Taiwan nga kinahanglan lang giyahan og insakto.
Nidugang ang CFC nga ang ilang pagpakigtambayayong ni Pacquiao seguradong makatabang og dako sa ilang mga boksidor.
Si Pacquiao, 45, nagbawon og 62-8-2, 39 KOs nga rekord sa iyang pagretiro.