Sa interbyu sa TMZ Sports ning bag-uhay lang, gibutyag ni Filipino boxing legend Manny Pacquiao nga hingpit na niyang biyaan ang politika ug magtutok na lang siya sa iyang karera isip usa ka boksidor.
Si Pacquiao, kinsa nilansar pagbalik isip senador sa niaging midterm elections sa Pilipinas apan napilde, nitataw nga nahurot na ang iyang interest ug wala na siya’y tinguha nga mobalik pa sa politika, nga iyang gihulagway nga hugaw.
“Zero in my mind about politics,” matod ni Pacquiao. “Politics is so dirty. I don’t like that. When I was in politics, I wanted to serve honestly. I want to serve people because that’s our legacy,” matod sa Pambansang Kamao ng Pilipinas.
Si Pacquaio, kinsa nagserbisyo isip senador gikan niadtong 2016 hangtod 2022, kasamtangang naa sa hugot nga pagpangandam alang sa iyang pagbalik og away gikan sa dul-an sa upat ka mga tuig nga pagretiro.
Ang bugtong 8-division world champion sa kasaysayan sa boksing nakatakdang mosuway pag-ilog sa korona ni World Boxing Council (WBC) welterweight champion American Mario Barrios karong Hulyo 19, 2025 sa MGM Grand Garden Arena sa Las Vegas, USA.
Nagkanayon si Pacquiao nga mapasalamaton siya sa mga nagpadayag og kabalaka kabahin sa iyang desisyon nga mobalik og away taliwala sa iyang pangidaron nga 46.
Apan iyang giklaro nga wala’y angay kabalak-an ug iyang gipaneguro nga kaya pa niyang moaway.
“I’m still here. As long as my body can fight, then I’ll fight,” matod ni Pacquiao. / ESL