Opisyal na nga gianunsyo ni Filipino boxing legend Manny Pacquiao nga mobalik siya’g away human sa dul-an sa upat ka mga tuig nga pagretiro.
Sama sa sayong mga taho, ang Pambansang Kamao ng Pilipinas nakatakdang makig-away ni World Boxing Council (WBC) welterweight champion American Mario Barrios karong Hulyo 19, 2025, sa MGM Grand sa Las Vegas, USA.
“I’m back,” post ni Pacquiao sa social media nga napatik sa www.boxingscene.com. “On July 19, I’ll return to the ring to face WBC welterweight champion Mario Barrios at the MGM Grand in Las Vegas.”
Ning bag-uhay lang, si Pacquiao, kinsa maoy bugtong 8-division world champion sa kasaysayan sa boksing, nibiyahe sa US aron sugdan ang iyang training camp.
Si Pacquiao, 46, katapusang niaway niadtong Agusto, 2021 diin napilde siya pinaagi sa unanimous decision batok sa ni Cuban Yordenis Ugas.
Naggunit si Pacquiao og 62-8-2, 39KOs nga baraha samtang ang 30 anyos nga si Barrios adunay 29-2-1, 18KOs nga baraha. / ESL