SA iyang pagbalik sa nasod human sa iyang comeback fight sa Las Vegas, USA ug romantikong bakasyon sa Italy kauban ang iyang asawa nga si Jinkee, gibutyag ni Filipino boxing legend Manny Pacquiao nga dili ra madugay ug moaway na sab siya pagbalik.
“This year. Mga December,” matod sa bugtong 8-division world champion nga napatik sa www.gmanews.tv.
Kabahin sa venue, matod sa Pambansang Kamao ng Pilipinas nga gusto niya sa MGM Grand Garden gihapon sa Las Vegas.
Gipasabot ni Pacquiao nga sa kasaysayan, siya ang boksidor nga niaway sa MGM sa labing daghang higayon ug iya kining gihulagway nga makasaysayon.
“History din yun dahil ako pinakamarami ng fight sa MGM. Nag-isa, ako lang nag-isa,” pasabot ni Pacquiao.
Giklaro ni Pacquiao nga pipila lang ka mga adlaw human sa ilang away ni World Boxing Council (WBC) welterweight champion American Mario Barrios niadtong Hulyo 19, nga niresulta sa majority draw, nibalik dayon siya sa pag-training.
“After the fight, three or four days later, nag-jogging na ako ulit,” batbat sa Hall of Famer nga boksidor.
“Focus lang talaga. No distractions. Even Sundays, I’d go to church then rest for the next day’s training.”
Matod ni Pacquiao nga bisan duha lang ka mga buwan siya nga nag-training sa ilang away ni Barrios unya mao pa sab kini ang iyang pagbalik og away gikan sa dul-an sa upat ka mga tuig nga pagretiro, kuntento ra siya sa iyang gipakitang away.
“Satisfied ako sa condition ko, but not yet 100%. Yung speed, timing, more punches… kulang pa. Twelve rounds against a younger opponent — okay na yun,” pagtino ni Pacquiao.
Gipasabot nang daan ni Pacquiao nga sa sunod niyang away, kinahanglang makompleto niya ang unom ka mga buwan nga training, nga maoy gikinahanglan.
Sa pagkakaron, asoy ni Pacquiao nga ‘“Relax muna. Pero training pa rin.” / ESL