Gipasalig ni Filipino boxing legend Manny Pacquiao nga siyento porsiyento ang iyang kondisyon sa sunod niyang away.
Matod sa Pambansang Kamao ng Pilipinas nga sa iyang pagbalik og away gikan sa dul-an sa upat ka mga tuig nga pagretiro, dili 100% ang iyang kondisyon apan mapasigarbuon siya nga nakahatag gihapon siya og saktong away.
Gipasabot ni Pacquiao nga tungod sa iyang paglansar og balik sa niaging eleksyon sa Pilipinas, sulod lang sa duha ka mga buwan siya nag-training sa iyang pagsuway og ilog sa korona ni World Boxing Council (WBC) welterweight champion Mario Barrios niadtong Hulyo 20, 2025.
Taliwala niini, napakita ni Pacquiao nga aduna gihapon siya’y saktong ikabuga sa edad nga 46 human niresulta sa majority draw ang ilang away ni Barrios.
Gani alang ni Pacquiao, nidaog siya sa maong away. Hinuon, iyang giklaro nga gidawat ra niya ang desisyon sa judges.
Matod ni Pacquiao nga sa kasagaran, tulo ngadto sa upat ka mga buwan siya mag-training alang sa usa ka away, nga wala niya nabuhat batok ni Barrios tungod sa kahagip-ot sa panahon.
Sa sunod niyang away, gipasalig sa bugtong 8-division world champion nga kompletuhon niya ang iyang training aron maabot niya ang 100% nga kondisyon.
“I’m already in shape. With a few months’ more training, I can come back and be 100 percent for any style. I’m ready to go. Of course, I’ll pray to God for good health,” batbat ni Pacquiao nga napatik sa www.boxingscene.com.
Giklaro sab ni Pacquiao nga tinguha niyang kontrahon ang labing maayong mga boksidor sa iyang timbang aron ipamatuod nga nga dili pinansyal ang iyang giapas ning pagbalik niya’g away, kon dili dungog, nga magpalig-on og samot sa iyang legasiya.
“My main concern is the preparation, because I’m not interested in fighting B-class, low-class fighters just to fight for money. I want to fight with honor, in a competitive fight,” dugang ni Pacquiao.
Kabahin sa iyang pangidaron, gihimong basehan ni Pacquiao ang bibliya.
“The bible tells us that Moses, even at age [120], his strength never changed from the time he was young. So I realized, with discipline and belief in God. God will give you strength,” asoy ni Pacquiao. / ESL