Gidumog sa boxing fans ang retirado nga Filipino boxing legend, Manny Pacquiao, sa Japan diin iyang ikasangka ang kickboxer nga si Rukiya Anpo.
Mag-abot sa ring sila si Pacquiao ug Anpo karong adlawa sa usa ka exhibition match sa Saitama Super Arena, Japan.
Ang 45-anyos nga Pacquiao mosaka sa ring kontra ang 28-anyos nga si Japanese kickboxer ug kanhi K-1 super-lightweight champion sa three-round special attraction nga gi-organisar sa Japan outfit RIZIN.
Dili unta si Anpo ang kontrahon ni Pacquiao, apan gipuli kini human naaksidente atol sa training ang orihinal nga kontra nga si Japanese martial artist Chihiro Suzuki.
Wa gihapon mawala ang kasikat ni Pacquiao bisan tulo na kini ka tuig niretiro sa professional boxing.
Gitapukan si Pacquiao sa fans ug media sa Japan media workout kagahapon diin iyang gipakita ang abilidad sa pagboksing.
Nag mitts si Pacquiao sa iyang long-time trainer Buboy Fernandez sa puno nga Kod Lab gym sa Shinjuku City ug nag stretching ug shadow boxing pud atubangan sa Japanese media.
Si Pacquiao niretiro tuig 2021 human siya gipilde ni Cuban Yordenis Ugas sa Las Vegas.
Apan adunay hugonhugon nga mobalik si Pacquiao og away isip pro boxer. Nabalita nga posible makontra sa Filipino great si Mario Barrios para sa World Boxing Council (WBC) welterweight title fight.
Bisan wa na moduwa si Pacquaio, aktibo gihapon siya sa exhibition match. Ang iyang uwahi nga duwa kontra ni South Korean martial artist DK Yoo diin siya nidaug pinaagi sa desisyon. / RSC