Niabot na US si Filipino boxing legend Manny Pacquiao sa Lunes, Mayo 19, 2025, ug gituohan nga ang tuyo ug tumong sa Pambansang Kamao ng Pilipinas mao ang pagtambong sa opisyal nga pag-anunsyo sa iyang pagbalik og away.
Gikataho nga molugnot si Pacquiao gikan sa dul-an sa upat ka tuig nga pagretiro aron suwayan pag-ilog ang korona ni World Boxing Council (WBC) welterweight champion American Mario Barrios karong Hulyo 19, 2025, sa Las Vegas.
Si Pacquiao kinsa maoy bugtong 8-division world champion sa kasaysayan sa boksing, kauban ang iyang asawa nga si Jinkee, gisugat sa ilang anak nga si Jimuel kinsa nagbase na karon sa US.
Wala pa’y kompirmasyon kon ang pagbiyahe ni Pacquiao kabahin sa opisyal nga pag-anunsyo sa ilang away ni Barrios.
Labing seguro, lakip sa katuyoan ni Pacquiao ning maong biyahe mao ang pagtambong sa iyang pormal nga pagkahiluna sa International Boxing Hall of Fame nga gikatakda karong Hunyo 5-8 sa Canastota, New York.
Ang kampo ni Pacquiao ug Barrios parehong wala pa’y gibuhian nga opisyal nga anunsyo kabahin sa ilang panagsangka apan dako ang posibilidad nga madayon kini hilabi na dihang napilde si Pacquiao sa iyang paglansar og balik isip senador sa niaging midterm elections sa Pilipinas.
Si Pacquiao kinsa nag-edad na og 46, naggunit og 62-8-2, 39 KOs samtang ang 30 anyos nga si Barrios adunay 29-2-1, 18KOs nga baraha. / ESL