Makabulsa og $5 million o kapin sa P290 million nga bonus si Filipino boxing legend Manny Pacquiao kon mapatiran siya ni Japanese kickboxer Rukiya Anpo sa ilang exhibition bout karong Hulyo 28, 2024 sa Super RIZIN 3 sa Japan.
Patakaran sa boksing maoy subayon sa away hinungdan nga gidili ang pagpatid nga tataw maoy kinaham sa six-footer nga si Anpo.
Gilakip sa kontrata ang dakong bonus aron protektahan si Pacquiao sama sa nalatid sa RIZIN exhibition bouts ni Floyd Mayweather batok nila ni Tenshin Nasukawa ug Mikuru Asakura.
Sa interbyo sa World Boxing News, nagkanayon si Pacquiao nga dako ang iyang pagsalig ni RIZIN boss Nobuyuki Sakakibara hinungdan nga wala siya nabalaka nga adunay dili maayong mahitabo sa promosyon.
Human ning awaya, gilaumang pahugtan na ni Pacquiao ang iyang training alang sa iyang pagbalik og away sa professional rank batok kang World Boxing Council (WBC) welterweight champion American Mario Barrios. / ESL