Gikompirmar sa World Boxing Council (WBC) nga negatibo si Filipino boxing legend sa drug test kabahin sa pag-challenge niini kang WBC welterweight champion American Mario Barrios niadtong Hulyo 19, 2025, sa MGM Grand Garden Arena sa Las Vegas.
Mismong si WBC President Mauricio Sulaiman ang nianunsyo niini sa social media diin iyang gipakita nga nakompleto na ang katapusang round sa Voluntary Anti-Doping Association (Vada) testing.
Negatibo sab ang resulta sa habig ni Barrios.
“Just received from VADA Testing the final notification on testing performed on Manny Pacquiao and Mario Barrios for their fight, and all negative,” post ni Sulaiman.
“Thank you, Premier Boxing Champions (and Al Haymon), for your dedication and care for safety and clean boxing.”
Ang opisyal nga resulta sa testing nagtuldok kabahin sa mga pagduda nga posibleng naggamit og performance enhancing drugs (Peds) si Pacquiao gumikan kay nakapakita gihapon kini og saktong abilidad taliwala sa pangidaron niini nga 46.
Bisan dul-an sa upat ka mga tuig nga wala nakaaway si Pacquiao, nakasukol gihapon kini og insakto batok sa 30 anyos nga si Barrios. Ang away niresulta sa majority draw.
Sa wala pa ang away, ang WBC ni-enroll nila ni Pacquiao ug Barrios sa Clean Boxing Program, nga adunay mandatu alang sa random drug testing sa tanang top-ranked fighters ug world title challengers.
Ning maong kalambuan, mas nidako ang posibilidad nga mag-away pagbalik sila si Pacquiao ug Barrios.
Hinuon aduna pa’y laing mga boksidor nga posibleng sunod nga makontra ni Pacquiao, kinsa maoy bugtong nakalangkat og world titles sa walo ka managlahing weight divisions.
Nag-una ning maong listahan mao si American Floyd Mayweather, kinsa nilupig ni Pacquiao pinaagi sa unanimous decision sa ilang away niadtong 2015.
Dugay ra nagtinguha si Pacquiao nga makig-away pagbalik ni Mayweather apan hangtod karon, hanap pa gihapon nga mahitabo kini. / ESL