Sa pagtuo ni British boxing star Amir Khan, mapilde si Filipino boxing legend Manny Pacquiao kon madayon ang tinguha niini nga mobalik og away aron kontrahon si World Boxing Council (WBC) welterweight champion American Mario Barrios.
Mao kini ang gipabuhagay ni Barrios sa interbyu sa world boxing news (WBN) atol sa iyang pagbiyahe sa Saudi Arabia aron pagsaksi sa away nila ni Saul Canelo Alvarez ug William Scull ning bag-uhay lang.
Gipasabot ni Khan nga nasuweto siya sa abilidad nila ni Pacquiao ug Barrios gumikan kay pareho kini niyang gikadungan sa pag-training kaniadto sa Wild Card gym ni Freddie Roach sa Los Angeles.
“I know Barrios really well, and I think he’s a great fight for Manny Pacquiao. I think he wins that fight.” matod ni Khan sa WBN.
“I’ve trained with Manny and Barrios, and I just think the younger, fresher fighter will win that fight.”
Si Pacquiao, kinsa katapusang niaway kaniadto pang 2021, nag-edad na og 46 samtang si Barrios nag-edad pa lang og 29.
Nanghinaot si Khan nga kining plano ni Pacquiao nga mobalik og away dili tungod kay nag-apas lang kini sa pinansyal.
“I just hope it’s not because of financial reasons. Let’s hope it’s not like that, you know,” dugang ni Khan,
“That’s what hurts the most, when great champions like Manny Pacquiao have to come back to the ring to fight to make that money. It’s quite sad to see.”
Si Khan nagtinguha untang makig-away ni Pacquiao kaniadto apan wala gyud kini nahitabo.
Sa kasamtangan, gipadaplin una ni Pacquiao ang iyang boxing career gumikan kay nagtutok kini sa umaabot eleksyon sa Pilipinas karong Mayo 12 diin nagtinguha kining makabalik sa senado. / ESL