Pormal nang masulod ang Filipino boxing legend nga si Manny Pacquiao isip kabahin sa Class of 2025 sa International Boxing Hall of Fame karong adlawa, Hunyo 9, 2025.
Kauban sa pag-induct ni Pacquiao sa men’s modern category mao sila Vinny "The Pazmanian Devil" Paz, kanhing junior middleweight champion, ug Michael Nunn, kanhing middleweight ug super-middleweight title holder.
Sa women’s modern category, mao sila Yessica Chavez, Anne Sophie Mathis, ug Mary Jo Sanders.
Apil sa batch ang legend nga referee nga si Kenny Bayless, ug si Ross Greenburg, kanhi presidente sa HBO Sports ug TV producer, nga responsable sa mga dokumentaryo sa dagkong away ni Pacquiao batok nila Oscar De La Hoya, Miguel Cotto, ug Antonio Margarito.
Si Pacquiao ang nag-inusarang boksidor sa kalibutan nga nakadaog og titulo sa walo ka lain-laing weight divisions—usa ka talagsaong record nga wala pa mailhi nga nakalabaw.
Siya usab ang ikaupat nga Pilipino nga gi-enshrine sa International Boxing Hall of Fame sukad kini nagsugod sa ilang tinuig nga selebrasyon niadtong 1990.
Una nang nasulod sa Hall of Fame ang mga haligi sa boksing Pilipino nga si Gabriel “Flash” Elorde, nga unang Pilipino ug Asyano nga gi-induct niadtong 1993 (modern category), Pancho Villa niadtong 1994 (old-timer category), ug ang iladong promoter, manager ug matchmaker Lope “Papa” Sarreal sa tuig 2005 (non-participant category). / RSC