Ang boxing legend nga si Manny Pacquiao wa maguol nga mas inilog ang iyang kontra nga si Mario Barrios sa ilang panagsangka Dominggo, Hulyo 20 (PH time) para sa World Boxing Council (WBC) welterweight title didto sa MGM Grand Garden Arena, Las Vegas, Nevada.
Si Pacquiao, 46, ang bugtong eight-division world champion sa kasaysayan mibalik sa professional fight human sa dul-an upat ka tuig nga pahuway.
Mas batan-on pud og 16 ka tuig ang 30-anyos nga si Barrios ug mao ang naghupot sa WBC welterweight belt.
Gipaburan sa mga oddsmaker si Barrios (-300) batok kang Pacquiao (+225) sa maong away.
“That’s fine. There were so many fights where I’m an underdog and I brought some surprises for them,” matod ni Pacquiao.
Sa weigh in kagahapon, nitimbang si Pacquiao og 146.8 pounds, samtang si Barrios mitala og 146.2. Tuod di kini ang unang higayon nga nahimong underdog si Pacquio ug mipakurat sa tibuok kalibutan sa makabungog ka kadaugan.
Sa sayong bahin sa career ni Pacquiao, gipildi niya si Lehlo Ledwaba sa sixth round para sa WBC super-bantamweight belt. Siya usa ka replacement fighter lang atong tungora.
Nahimong underdog pud si Pacquaio sa ilang away ni Oscar De La Hoya, diin midaog ang Pinoy boxer pinaagi sa eight-round demolition tuig 2008.
Sa ilang away pud ni Antonio Margarito wa pabori si Pacquiao kay kuno dako ra para kaniya si Margarito.
Niadtong 2019, sa edad nga 40 anyos gilupig pud ni Pacquaio ang kanhi undefeated champion nga si Keith Thurman.
Samtang si Barrios nagkanayon nga wala siya magtan-aw sa mga odds, inilog or biya man, iya gyud ipahibalo sa tibuok kalibutan nga siya ang kampiyon.
“I wasn’t aware. I don’t really pay attention to the odds. I just put in the work, show up. Regardless of favorite or not, I’m just going to show why I’m the current WBC champion,” matod ni Barrios.
Mao kini ang unang professional fight ni Pacquiao sukad gipildi siya ni Yordenis Ugas niadtong Agusto 2021. / RSC