Nalubog lang kalit ang giplanong pag-challenge ni Filipino boxing legend Manny Pacquiao batok ni World Boxing Council (WBC) welterweight champion American Mario Barrios.
Kini human sa gipakitang away sa 45 anyos nga si Pacquiao batok ni Japanese kickboxer Rukiya Anpo sa usa ka exhibition bout nga tipik sa Super RIZIN 3 promotion niadtong Dominggo sa gabii, Hulyo 28, 2024, sa Japan.
Ning maong three-round fight, tataw nga wala’y ikabuga ang Pambansang Kamao ng Pilipinas batok sa 6-footer nga kontra.
Sa usa exhibition bout, ideklarar nga tabla ang away kon wala’y ma-knockout.
Basi sa gipakitang away ni Pacquiao, daghan ang niingon nga angayang magpabilin na lang nga retirado ang bugtong 8-division world champion sa kalibutan basi sa taho sa www.boxingscene.com.
Ang World Boxing News mao ang labing unang nitaho kabahin sa posibleng panagharong nila ni Pacquiao ug Barrios sa ulahing bahin ning tuig 2024.
Mas niamag ang purohan nga madayon ang away human kini gihatagan og pagtugot ni WBC president Mauricio Sulaiman.
Apan sa nahitabo niadtong Dominggo, giingon nga maglisod na ang WBC sa pag-justify nga aduna pa’y ikabuga si Pacquiao nga makalangkat pagbalik og world title. / ESL