Hapit na mahuman ang pag-ayo sa nadaot nga bahin sa rubberized track oval sa Cebu City Sports Center (CCSC) ug ang kontraktor nipadayag nga ang mga kadaot nga nahitabo human sa ilang pag-ayo dili na masakop sa ilang warranty.
Mao kini ang pamahayag ni Shaun Doherty sa SBD Builders nga nitug-an sa SunStar Cebu niadtong Lunes, Disyembre 9, 2024.
Apan nabalaka sila nga madiskubrehan ang mga bag-ong danyos ilabina nga adunay umaabot nga kalihukan sa CCSC sa dili pa kini ma-turnover sa Cebu City Government.
Sa press conference niadtong Lunes, Disyembre 9, 2024, si Cebu City mayor Raymond Alvin Garcia niingon nga nagpaabot siya sa final report sa Department of Engineering and Public Works (DEPW) una nila dawaton sa hingpit ang proyekto.
Kahinumdoman nga ang pipila ka bahin sa rubberized oval track nangabuslot human sa 64th Palarong Pambansa niadtong Hulyo.
Nakadawat sa daghang pagsaway dihang gidalidali sa paghuman aron magamit sa naasoy nga kalihukan bisan ang CCSC gisirad-an og dul-an sa usa ka tuig alang sa renobasyon.
Nisamot human sa laing dakong kalihukan sa CCSC ang gipahigayon nga mao ang Pasigarbo sa Sugbo 2024.
Samtang, ang SBD Builders nisanong sa pag-ayo sa oval human nga nasulod pa sa warranty sa kontrata./EHP/RRM