Nagubot ang disko nga gipasiugdahan sa kahugpongan sa mga batan-on sa Sityo Lolokhan sa Barangay Sua, bukirang dapit sa lungsod sa Argao, alas 12 sa tungang gabii, Agusto 25, 2024, sa dihang usa ka pag-umangkon ang gidunggab sa iyang uyoan ug naangol.
Ang biktima giila nga si 'Clito', 49, ug ang suspek mao si 'Nilo', 59, minyo, pulos taga Sityo Lolokhan, Sua sa Argao.
Sa pagsubay sa Superbalita Cebu nasuta sa imbestigasyon sa kapulisan sa Argao Municipal Police Station ubos sa kamandoan sa ilang hepe nga si P/Maj. Janus Giangan, ang biktima ug ang suspek nagkuyog og inom samtang nitambong sa disko.
Matod pa nga ang pag-umangkon pagka alas 12 sa tungang gabii, nilingkod kini sa usa ka lingkuranan aron pagpahuway ug nakatulog.
Sumala sa mga saksi, sa way igong hinungdan o katarungan, gidunggab sa suspek nga uyoan ang iyang pag-umangkon nga naigo sa iyang wang bahin sa dughan.
Tungod niini, nahunong ang disko human dunay nahitabo nga rambol human dunay nilaban sa biktima hinungdan nga nasamdan usab sa nawong ang suspek sa karambola.
Si Brgy. Konsehal Leomar Delos Reyes niuwang sa panag-away ug ang biktima dali nga gidala sa ICKMH Bogo Argao District Hospital.
Ang suspek nitahan ngadto ni Delos Reyes.
Gi-turnover ang suspek ngadto sa mga polis sa lungsod nga ningresponde sa alarma sa kasamok sa disko sa dapit ug pagpanunggab sa uyoan sa iyang pag-umangkon. / DVG