Pag-umanglon ug uyoan nga nabutang sa listahan nga high value individual nadakpan sa anti illegal drug operation sa mga sakop sa City Drug Enforcement Unit sa Cebu City Police Office alas 3:14 sa Sabado sa kaadlawon, Abril 6, 2024 sa Sitio Plastikan, Barangay Duljo Fatima, dakbayan sa Sugbo.
Ang mga suspek giila nga sila si John Albert Homecillo, alyas “Pidoy”, 26, taga Sitio Riverside, Barangay Duljo Fatima ug Jessin Abuyo Homecillo, 41, uyoan sa target, silingan ra.
Nakuha gikan kanila ang dagkong mga putos sa gituohang shabu nga motimbang og 1,030 gramos nga dunay standard drug price (SDP) nga P7,004,000.
Ang duha pulos nabutang sa drug watch list sa kapulisan nga mamaligya sa ilegal nga drugas nga tungod ani, sila gipaubos sa monitoring sa kapulisan.
Sa imbestigasyon sa CDEU, sila nitug-an nga dunay contact nga drug player sulod sa mga jail facility nga matod pa maoy mo-supply kanila sa ilegal nga drugas.
Giingong makabaligya si Pidoy og 500 gramos nga shabu matag semana diin ang iyang area mao ang Duljo Fatima ug kasikbit nga mga barangay.
DALAGA’NG DURUGISTA?
Sa laing bahin, babaye nga giila nga High Value Individual (HVI) sa kapulisan sa illegal drugs nadakpan sa buy-bust sa Mandaue City Police Station 4 Drugs Enforcement Unit.
Ang operasyon niadtong Sabado sa alas 9:25 sa gabii, Abril 6, sa Sudlon, Barangay Maguikay, Siyudad sa Mandaue gipangulohan sa ilang station commander nga si P/Major Mikhael Mallorca pinaagi sa koordinasyon sa Philippine Drug Enforcement Agency (PDEA 7). Ang suspek giila nga si Ingrid Lopez Gabutan, alyas Ing-ing, 43, dalaga, taga Sityo All Season, Brgy. Cogon-Pardo, Siyudad sa Sugbo.
Ang SDEU PS-4 nakakuha og kasayuran nga ang suspek nga taga Siyudad sa Sugbo magbaligyaan og shabu sa Siyudad sa Mandaue hinungdan nga gi-validate.
Nakuhaan ang ginang og shabu nga motimbang og 150 gramos nga may standard drug price (SDP) nga P1,020,000. / AYB, DVG