Pagpaubos sa edad sa mga menor de edad nga makiha kon makahimo og krimen, gisugyot nga tun-an pag-ayo.
Sa kasamtangan nga Republic Act 9344, o Juvenile Justice and Welfare Act of 2006 ang edad nga mahimong mapahamtangan sa maong balaod mao kadtong nag pangedaron og 15 pataas.
Nagkadaghan ang mga kaso nga naglambigit sa minors ug ang labing bag-o kadtong krimen nga nahitabo sa Dakbayan sa Tagum, Davao del Norte nga gipatay sa tulo ka tulisan ang 19-anyos nga babaye sa sulod sa iyang balay.
Ang mga nalambigit nagpangedaron og 17, 15 ug 14 anyos nga pulos gitudlo sa mga saksi nga maoy naghimo sa krimen. Tungod niini, gibanhaw ni Senador Robin Padilla ang pag-usab sa kasamtangan nga Juvenile Justice Law ug mohimo siya og balaod pagpaubos sa edad gikan sa 15 ngadto sa 10 anyos ang mamahimong mapasakahan og kaso kon makahimo kini og krimen.
Alang kang Police Colonel Kimberly Molitas, ang bag-ong hepe sa Police Community Relation sa Police Regional Office 7, atol sa Kapihan sa PIA 7 nga kinahanglan nga tun-an pag ayo sa mga magbabalaod ang bag-ong gipasar nga balaod ni Padilla.
Si Molitas usa sa mga polis nga gitahasan nga mohimo og research sa National Capital Region Police Office labot sa krimen nga gikalambigitan sa minors nga dili mapasakahan og kaso tungod sa ilang edad.
Iyang gipahibalo nga sa dihang didto pa siya nadestino sa anti-narcotics unit isip under cover agent, siya ang labing unang polis nga nakapakombikto og usa ka menor sa Family Court nga ilang nadakpan sa anti-illegal drug operation.
Gitug-an sa police official nga sa tibuok kalibutan ang Pilipinas na lang ang dunay taas ang pangedaron sa Juvenile Law sanglit ng uban nga mga nasod sama sa North America, South America ug sa Europe 7, 8 ngadto sa 12 anyos ang dili mamahimong pasakahan og kaso. Alang kang Molitas ang 10 anyos pataas maoy angayan nga edad nga pasakahan og kaso apan kinahanglan kini nga tun-an pag-ayo sa mga experto. / AYB