Bisan taudtaod siya nga wala na nakaaway, nagtuo si Albert Pagara nga wala’y nausab ug siya lang gihapon ang boksidor nga nakahimo og pangalan dihang sakop pa siya sa nabungkag nga ALA stable sa Sugbo.
Nagkanayon si Pagara nga aduna pa siya’y saktong ikabuga ug iya kining ipamatuod karong Hunyo 15, 2024 sa iyang pagpakigharong ni Chinese Aketelieti Yelejian alang sa inilugay sa International Boxing Federation (IBF) Asia lightweight title sa City of Passi Arena sa Passi City.
Sa interbyu sa Sun.Star Cebu, nagkanayon si Pagara nga iyang ipakita ning awaya ang bunga sa iyang grabe nga training sulod sa tulo ka mga buwan.
Gikan sa pagkasirado sa ALA stable, si Pagara kaduha pa lang nakaaway diin midaog siya pinaagi sa unanimous decision batok ni Virgil Putol niadtong 2020 nga gisundan og 4th round TKO nga kadaugan batok ni Allan Villanueva niadtong 2022.
Si Pagara, kinsa adunay 34-1, 24KOs nga rekord, hugot nga nagbansaybansay sa bukid sa La Trinidad, Benguet diin iyang gika-sparring sila si ALA Boy Elmo Traya, MJ Uduna, Raymond Yanong ug world-rated super flyweight Jayr Raquinel.
Gibutyag ni Pagara nga grabe ang iyang paningkamot sa training ug dili siya molugak bisan gamay batok ni Yelejian, kinsa adunay 8-3-1, 2KOs nga rekord.
Magsangka sab sa samang promosyon sila si Jemuel Aranas (4-0, 2 KOs) batok Roderick Bautista (5-0, 4 KOs) alang sa inilugay sa Oriental and Pacific Boxing Federation (OPBF) Youth light flyweight title.
Mokompleto sa mga parisan mao ang tali nila ni John Kevin Jimenez (7-0, 3 KOs) batok Jeven Villacite (6-6-5, 1 KO), Junibert Bantay (3-0, 1 KO) batok Jeffrey Aguilar (3-3, 3 KOs), Kasty Flores (2-1, 2 KOs) batok Marlon Alejandro (4-4-2), Jeffrey Jimenez (1-0) batok Conrad Jason Asujar (0-2) ug Aldren Aton (0-1) batok Enecito Jagopar (0-4). / EKA