Pagara mobalik og away, June 15

Pagara mobalik og away, June 15
Boxing SunStar File photo

Human sa dul-an sa duha ka mga tuig, mobalik na pag-away si kanhi World Boxing Organization (WBO) Inter-Continental super bantamweight champion “Prince” Albert Pagara.

Ang kanhi sakop sa nabungkag nga ALA stable nakatakdang makig-away ni Chinese Aketelieti Yelejian alang sa inilugay sa International Boxing Federation (IBF) Asia lightweight title karong Hunyo 15, 2024 sa wala pa matino nga venue ubos sa promosyon ni Cebuano boxing patron Lorenzo “Chao” Sy.

Sa usa ka press conference, nagkanayon si Sy nga plano niyang ipahigayon ang away sa Nustar sa South Road Properties o sa Waterfront Hotel & Casino sa Salinas Drive, Cebu City.

Gipasabot ni Sy nga nadasig siya nga mopahigayon og dakong promosyon sa boxing human siya nakapahigayon og ginagmay nga promosyon.

“Suwayan nako ning dako nga promosyon, kon mosaler ni, aw magsige gyud ni,” matod ni Sy, kinsa nitataw nga iyaha gyud gipapangita si Pagara aron maoy moaway sa main event.

“Nagtuo man gyud ko nga ma-champion ni siya pagbalik,” dugang ni Sy.

Si Pagara, 29, kasamtangang nag-training sa Highlands Boxing Gym sa Benguet, Mountain Province.

Una siya nahunong pag-away niadtong Nobiyembre, 2022, si Pagara nagbawon og 34-1, 24KOs.

Ning iyang pagbalik, mokampanya si Pagara sa mas bug-at nga timbang diin ikaharong niya ang usa sa mga sumosulbong nga boksidor sa China nga adunay 8-3-1, 2KOs nga rekord. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph