Pagasa: Daghan’g tanom, mas bugnaw

Jhomer Eclarino:, weather specialist sa Pagasa Regional Services Division
Jhomer Eclarino:, weather specialist sa Pagasa Regional Services Division

Usa ka opisyal sa Philippine Atmospheric, Geophysical and Astronomical Services Administration (Pagasa) nagkanayon nga dako kaayo’g kalainan ang lugar nga daghan og tanom kay mas bugnaw kon itandi sa urbanized areas nga adunay dagha’g buildings.

Kini ang gibutyag ni Jhomer Eclarino, weather specialist sa Pagasa Regional Services Division.

Matod sa opisyal nga ang mas daghang tanom moresulta sa ubos nga temperatura sa ibabaw kon itandi sa kasyudaran o highly urbanized nga mga dapit, diin adunay daghang mga building ug sementadong mga dalan.

Siya nidugang nga ang presensya sa daghang mga establisemento maoy nagdala sa mas taas nga temperatura sa kawanangan.

Sumala sa United States Environmental Protection Agency, ang mga kahoy ug mga tanom, lakip na ang mga mugbo ug tag-as nga mga sagbot maoy hinungdan sa ubos nga temperatura kay maghatag kini og landong ug kabugnaw sa palibot pinaagi sa evaporation ug transpiration.

Pinaagi sa transpiration, ang mga kahoy ug mga tanom mosuyop sa tubig pinaagi sa ilang mga gamot ug mobugnaw sa ilang palibot pinaagi sa pagpagawas sa alisngaw sa tubig ngadto sa hangin pinaagi sa ilang mga dahon. Kini makatampo sa pagkunhod sa kainit.

Si Eclarino miasoy ngadto sa SunStar Cebu sa Biyernes, Mayo 3, nga ang labing taas nga heat index nga natala sa ilang palibot sa Pagasa Mactan karong tuiga mao ang 40 degrees Celsius diin adunay daghan’g mga kahoy ug mga utanon.

Apan matod niya nga mas ubos kini kon itandi sa siyudad sa Sugbo diin adunay daghan’g dagko’ng mga building ug malls nga gipalibutan og sementado nga karsada.

Usa ka nasudnong pamantalaan nitaho niadtong Abril 19, nga ang Department of Environment and Natural Resources (DENR) nagpasiugda sa pagmugna og urban green spaces aron maminusan ang pagsaka sa heat index sa nasod.

Gipatin-aw sa taho nga ang kainit makalingkawas gikan sa yuta, apan sa mga siyudad diin halos tanan sementado ang kainit magpabilin sa ibabaw.

Sa laing bahin, ang Pagasa padayon nga nagpahinumdom sa publiko nga mag-amping ug sundon ang mga lakang sa panglawas kay giisip nila nga ang bulan sa Mayo maoy adunay labing init nga mga adlaw sa tuig. / KJF,TPT

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph