Sa pag-oberba sa Semana Santa, mangandam ang Central Visayas (CV) kabahin sa heat indices gikan sa "extreme caution" hangtod sa "danger" nga kategoriya nga magsugod sa 38 hangtod 42 degrees Celsius.
Kini ang gibutyag sa weather specialist sa Philippine Atmospheric Geophysical and Astronomical Services Administration (Pagasa) Visayas nga si Joseph Merlas, sa usa ka interbyu niadtong Dominggo, Abril 13, 2025.
Ang heat index nagtumbok sa temperatura nga bation sa lawas sa tawo kon magsagol na ang pagkaalimuot ug init nga temperatura.
“For Central Visayas, sa kinatibuk-an nani, Ma'am, naa sa range up to 38 to pinakataas na pud ning 42 degrees Celsius, kay from the past five days naa na ta’y niabot og 42 degrees Celsius which is na-fall sa pinakababa sa danger level,” asoy ni Merlas.
Gidugang niya nga sa Metro Cebu, ang init nga temperatura magsugod gikan sa 26 hangtod 33 degrees Celsius.
Sumala sa website sa Pagasa, ang air temperature nga 30 hangtod 37 degrees Celsius kay ubos sa caution heat index, nga mabati sa lawas sa tawo sa 27 hangtod 32 degrees Celsius.
Sa extreme caution, ang heat index nga mabati sa lawas sa tawo manukad sa 33 hangtod 41 degrees Celsius nga adunay air temperature nga 38 hangtod 48 degrees Celsius.
Ang danger heat index magsugod sa 42 hangtod 51 degrees Celsius, uban sa air temperature nga 49 hangtod 50 degrees Celsius.
Samtang sa extreme danger category, ang heat index moabot og 52 degrees Celsius pataas.
Sa Cebu, ang Pagasa station sa Mactan nakatali sa pinakataas nga heat index nga 40 degrees Celsius.
Ang Pagasa Visayas station sa Cebu nakatali og heat index nga 40 degrees Celsius niadtong Abril 8, diin ang air temperature niadtong adlawa kay 32.3 degrees Celsius.
Samtang sa Bohol station, nakatali ang Pagasa Visayas og heat index nga 42 degrees Celsius niadtong Abril 7, 8, ug 9.
Pahimangno ni Merlas sa publiko nga likayan ang pagpanglakaw o pag-expose sa gawas gikan sa alas 10 sa buntag hangtod alas 4 sa hapon kay mao kini ang mga oras nga pinakainit.
Girekomenda usab niya nga mosul-ob og hayag nga sinina ug magpabiling hydrated o permi moinom og tubig aron presko ang pamati. /CDF