Samtang ang tropical cyclone nga Kabayan (Jelawat) mihuyang gikan sa usa ka tropical depression ngadto sa “remnants of low-pressure area” human mi-landfall sa lungsod sa Manay sa Davao Oriental, matod sa local weather state bureau sa Martes, Disyembre 19, 2023, nga ang publiko mahimong makapaabot sa mas maayong kahimtang sa panahon sa mga adlaw paingon sa Pasko.
Si Alfredo “Al” Quiblat Jr., hepe sa Philippine Atmospheric, Geophysical and Astronomical Services Administration (Pagasa) Mactan, niingon nga nihuyang ang Kabayan gumikan sa frictional impacts sa landfall human sa paglatas sa bukiron nga terrain sa Mindanao.
“Sugod karong adlawa (Martes), makasinati na kita og maayo nga kahimtang sa panahon, lahi kon itandi kagahapon (Lunes) nga padayon ang pag-ulan sa tibuok adlaw, karon makita na nato ang adlaw,” siya miingon.
Siya nidugang nga ang kahimtang sa panahon mahimong mas maayo sa umaabot nga mga adlaw hangtod sa Adlaw sa Pasko, Disyembre 25.
Si Quiblat, bisan pa, niingon nga posible gihapon nga adunay mga maporma nga mga dag-om sa kalangitan ug posibling hinay nga pag-ulan, dala sa localized thunderstorms o shear lines.
Ang shear line mahitabo sa panagtagbo sa bugnaw nga hangin gikan sa amihanang-sidlakang monsoon, o Amihan, ug init nga hangin gikan sa Dagat Pasipiko.
Way gale warning alert o timailhan sa kusog nga hangin nga giisa sa Central Visayas, posibleng adunay hangin nga dili paborable alang sa gagmay nga mga barko.
Niadtong Lunes, ang Pagasa niisa og gale warning alert sa Camotes Islands ug Bohol.
Wa nay kusog nga hangin sa Central Visayas apan gipataas gihapon sa Eastern Visayas ang gale warning.
Si Quiblat niingon usab nga ilang gibanabana nga wala nay tropical cyclones nga mosunod kang Kabayan hangtod sa katapusan sa tuig.
Kini nagpasabot nga 11 lang ka bagyo ang matala karong tuiga, sukwahi sa kasagaran nga 20 ka bagyo sa nasod matag tuig.