Gideklarar na sa Philippine Atmospheric, Geophysical, and Astronomical Services Administration (Pagasa) ang pagsulod sa ting-uwan niadtong Miyerkules, Mayo 29, 2024, apan wala pa hingpit nawala ang El Niño phenomenon.
Kini ang weather update ni Engr, Alfredo F. Quiblat Jr. nga nahinabi sa ‘Beyond The Headlines’ online news and commentary program sa SunStar Cebu sa Huwebes, Mayo 30, 2024.
Gipasabot ni Quiblat nga ang pag-agi sa unang bagyo sa tuig nga ‘Aghon’ ug ang pagbunok sa uwan matag-karon-ug-unya timaan nga ting-uwan na base sa pagsukod sa volume sa uwan sa ilang pito sa 13 ka mga observation facility sa Kabisay-an.
“Pero naa pa ang El Niño. Dunay average sa kainiton nga 36 degrees Celcius ngadto sa 42 nga heat index,” matod ni Quiblat, dili sama ang kahimtang sa ubang dapit.
Gikompirmar niya nga nagpatigbabaw na ang hangin nga Habagat hinungdan sa mas dagkong balod sa kadagatan sa panahon nga pag-unos o dunay weather disturbance.
Si Quiblat niingon nga 69% sa Hulyo, Agusto, ug Septiyembre motapos na ang ting-init, ug 69% sa samang bulan ang posibilidad sa La Niña apan kini mas mokusog sa ulahing bahin sa tuig.
Dugang niya nga sa mosunod nga lima ka mga adlaw, ang panglantaw sa panahon walay nagpakita nga adunay laing sunod nga bagyo nga anaa sa Philippine area of responsibility (PAR).
Si Quiblat niawhag sa katawhan nga magpadayon sa pag-update sa panahon gikan sa Pagasa website alang sa thunderstorms ug rainfall advisory. / Melecia Paloma Cando, Benedicto College intern