Walay bagyong nasigpatan sulod sa Philippine area of responsibility (PAR), gawas sa low pressure area (LPA).
Kini ang pamahayag ni Engr. Al Quiblat, direktor sa Philippine Atmospheric, Geophysical and Astronomical Services Administration (Pagasa) Visayas dihang nahinabi sa SunStar Cebu online commentary program ‘Beyond the Headlines’ sa Huwebes, Nobiyembre 16, 2023.
Matod ni Quiblat, ang pag-uwan-uwan masinati tungod sa sistema sa klima nga gitawag og shear line o panag-abot sa hangin nga init ug bugnaw.
Niadtong Martes, Nobiyembre 14, 2023, ang Pagasa niingon nga ang bagyo nga naa gawas sa nasod nahimo’ng LPA na lang sa pagsulod sa PAR.
Matod ni Quiblat, dili pa nila mabana-bana kon ang LPA mobalik sa pagkabagyo o malusaw sa hingpit.