Mismong si coach Tim Cone ang nikumpirmar nga apil si Brgy. Ginebra Gin Kings forward Troy Rosario sa Gilas Pilipinas pool diin kuhaon ang final 12 nga mokumbati sa ikaupat ug katapusang window sa 2025 FIBA Asia Cup qualifiers sa sunod buwan.
Sa interbyu sa Spin.ph, nagkanayon si Cone nga mokuyog ang 6’7” nga magduduwa sa umaabot nilang training camp sa Doha, Qatar.
Gikuha pagbalik sa Gilas si Rosario aron pagtapak sa haw-ang sa national team sa ilawom nga bahin nga nahitabo human naangol sila si Kai Sotto ug Kevin Quiambao.
Si Rosario katapusang nakaduwa sa Gilas niadtong 2021 Southeast Asian Games.
Giklaro ni Cone nga dili pa sigurado si Rosario nga masulod sa final 12, nagdepende pa ang tanan sa resulta sa ilang training camp.
“He will be competing for a spot in the 12,” matod ni Cone nga napatik sa Spin.ph.
Sa ikaupat nga window, moasdang ang Gilas sa Chinese Taipei karong Pebrero 20 ug New Zealand karong Pebrero 23. / ESL