Sa pagka-knockout ni boxing legend Manny Pacquiao sa niaging midterm elections sa Pilipinas diin nilansar siya pagbalik isip senador, gilauman nga dili na kapungan ang iyang pagbalik og away.
Taudtaod na sab hinuon ninggawas sa nagkadaiyang news outlets nga nakatakdang mobalik pag-away ang Pambansang Kamao ng Pilipinas karong Hulyo 19, 2025, sa Las Vegas aron suwayan pag-ilog ang korona ni World Boxing Council (WBC) welterweight champion American Barrios.
Apan wala pa’y pinal nga negusasyon niini ug wala pa’y kontrata nga napirmahan hinungdan nga wala pa kini kaseguroan nga madayon hilabi na kon nidaog pa si Pacquiao sa eleksyon.
Apan sa iyang pagkapilde sa eleksyon, gilauman nga motutok na si Pacquiao kabahin sa iyang paglugnot gikan sa upat ka mga tuig nga pagretiro.
Adunay mga hugonhugon nga opisyal na nga i-anunsyo ni Pacquiao sa umaabot nga pipila ka mga adlaw kon unsa nga lakang ang sunod niyang pagahimuon.
Si Pacquiao, kinsa nag-edad og 46, adunay 62-8-2, 39KOs nga rekord. / ESL