Sa sunod nga adlaw, niadto kami sa Arc de Triomphe, simbolo sa garbo ug kasaysayan sa France. Sa pagbarog namo ilawom sa dako kaayong arko, among mabatyagan ang gibug-aton sa mga siglo—mga kadaugan, mga kapildihan, ug ang nagpadayon nga espirito sa nasod.
Gikan didto, gisugyot ni Rochelle nga moadto kami sa Galeries Lafayette Paris, usa ka lugar nga dugay na niyang gusto bisitahon.
Siya ug akong mother-in-law nagtan-aw og mga bag ug uban pang butang, nag-enjoy sa kaelegante sa mao nga tindahan. Samtang sila nag-shopping, ako ug akong anak nga si Kyle naglibotlibot sa building, nagpalit og souvenirs ug nagtan-aw sa matahom nga façade ug iconic nga glass dome ceiling. Nagpahinumdom kini nga ang katahom sa Paris dili lang makita sa mga monumento; makita kini sa mga detalye sa adlaw-adlaw nga lugar.
Sa ikatulong adlaw, niadto kami sa gawas sa siyudad padulong sa Palace of Versailles. Sa pag-abot pa lang, overwhelming na ang kadak-on ug kaanindot. Ang palasyo nitindog sama sa usa ka pamatuod sa ambisyon sa hari—bulawanong ganghaan, halapad nga mga garden, ug mga hall nga murag walay katapusan.
Sa paglakaw namo sa Hall of Mirrors, mura kami’g nadala sa lain nga panahon, naghunahuna sa mga hari, mga reyna, ug mga diplomat nga kaniadto naglakaw sa maong lugar.
Bisan pa sa kainit, ang Versailles nagpabiling makapahingangha, usa ka lugar diin nagtagbo ang arte ug gahom.
Sa among ikaupat nga adlaw, mibalik kami sa kasingkasing sa Paris aron bisitahon ang Musée d’Orsay ug ang bantog nga Louvre. Ang Musée d’Orsay, nga usa ka kanhi railway station, nagpakita og koleksiyon sa Impressionist masterpieces nga hilom ug buhi sa mata. Unya, sa pagsulod sa Louvre, mura kami’g nisulod sa usa ka treasure vault. Ang halapad nga mga hall niini puno sa mga obra nga naghulma sa kalibotan—mga painting, mga eskultura, ug mga artifact gikan sa karaang mga sibilisasyon. Ang pagtan-aw sa mga obra sa personal, dili lang sa libro o dokumentaryo, makapa-humble. Ang Louvre tinuod gyud nga angay tawagon nga numero uno nga museum sa kalibotan.
Pagkahapon, nangutana si Kyle kon pwede ba mi nga mobalik sa Eiffel Tower aron amo gyud nga masaka ang tumoy niini. Giingnan ko siya nga amo kini nga pagabuhaton sa among pagbalik gikan sa Siyudad sa London nga maoy sunod namo nga destinasyon.
Ang among kasinatian sa Paris di namo malimtan kay di kini kada adlaw nga kasinatian, kondi, makausa o panagsa ra sa tibuok kinabuhi. Mobalik mi kay nahigugma ko sa Paris. /