NAGPAREHISTRO: Ang mga nagparehistro ningdagsa sa buha­tan sa Commission on Elections (Comelec) sa dalan P. Burgos, eskina Osmeña Blvd., dakbayan sa Sugbo sa Lunes, Pebrero 12, 2024.
NAGPAREHISTRO: Ang mga nagparehistro ningdagsa sa buha­tan sa Commission on Elections (Comelec) sa dalan P. Burgos, eskina Osmeña Blvd., dakbayan sa Sugbo sa Lunes, Pebrero 12, 2024. ARKEEN M. LARISMA

Pagbukas sa voter’s registration, gidagsa

Gidagsa sa mga tawo ilabi na sa mga bag-ong aplikante ang buhatan sa Commission on Elections (Comelec) atol sa unang adlaw sa rehistrasyon sa mga botante sa Lunes, Pebrero 12, 2024, alang sa mid-term elections sa Mayo 2025.

Ang pito ka buwan nga voter’s registration hangtod sa Septiyembre 30.

Sumala sa Comelec nga sagad sa ilang nadawat nga new registrants sa unang adlaw mao ang mga batan-on nga gusto’ng makabotar sa sunod tuig nga piniliay.

Nidugang sab kini nga adunay pipila ka transferees sa ilang rehistro ug dunay gikan sa ubang lalawigan.

Lakip usab sa mga botante ang nipa-reactivate sa ilang status human napapas ang ilang mga ngan sa voter’s list gumikan sa wala pagbotar og duha ka sunodsunod nga e­­leksyon.

Lakip sa mga pakulo sa Comelec, ilabi na sa dakbayan sa Carcar, ang pagpanghatag og freebies sa unang 200 ka mga aplikante sa maong siyudad.

Ang first 200 applicants na­kadawat og libreng chocolate ug face mask atol sa ilang pagpahimo sa pag-resume na sa voter’s registration lukop nasod.

Gawas niini, mo-issue sab og libreng voter’s certification subay ning pagsugod na sa voter’s registration.

Si Omar Sharif Dilangalen Mamalinta, tigpamaba sa Comelec Cebu Province, una na nga nanawagan usab sa mga opisyal sa barangay nga abagan ang buhatan sa pagpahibawo sa mga residente nga wala pa makaparehistro nga modangop na sa duol nga Comelec offices aron hingpit nga makabotar sa umaabot nga piniliay.

Ang pagpadayon sa voter’s registration molungtad pa sa Septiyembre 30, 2024.

SunStar Publishing Inc.
www.sunstar.com.ph